 |
| មន្ត្រីជាន់ខ្ពស់គណបក្សប្រជាជនកម្ពុជា និងជាតំណាងរាស្ត្រ លោក
ជាម យៀម (ឆ្វេង) និងអ្នកនាំពាក្យគណបក្សប្រជាជនកម្ពុជា លោក សុខ ឥសាន។
RFA/Brach Chev
|
មន្ត្រី បក្សកាន់អំណាច យល់ផ្ទុយគ្នា ថា សមាជិក គ.ជ.ប. ត្រូវ បាត់បង់ ក្រោយរំលាយ បក្សប្រឆាំង
RFA / វិទ្យុ អាស៊ី សេរី | ១៩ តុលា ២០១៧
ស្ដាប់ ឬទាញយកសំឡេង
មន្ត្រីជាន់ខ្ពស់ គណបក្ស ប្រជាជន កម្ពុជា អះអាង ផ្ទុយគ្នា ជុំវិញ អនាគត នៃថ្នាក់ដឹកនាំ គណៈកម្មាធិការ ជាតិ រៀបចំ ការបោះឆ្នោត ដែលអតីត មកពីកូតា គណបក្ស សង្គ្រោះជាតិ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា បើសិនជាគណបក្សសង្គ្រោះជាតិ ត្រូវតុលាការរំលាយក្ដី គឺមិនប៉ះពាល់ដល់សមាជិកគ.ជ.ប. ដែលជាអតីតសមាជិកគណបក្សប្រឆាំងឡើយ។
លោក សុខ ឥសាន ឲ្យដឹងកាលពីថ្ងៃទី១៨ តុលា ថា ច្បាប់ស្ដីពីការរៀបចំ និងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោត បានចែងថា ថ្នាក់ដឹកនាំ ឬសមាជិកគ.ជ.បមិនមែនជាសមាជិករបស់គណបក្សណាមួយទេ ហើយស្ថាប័ននេះ នៅតែបំពេញការងាររបស់ខ្លួនធម្មតា។
ការលើកឡើងរបស់មន្ត្រីនាំពាក្យគណបក្សប្រជាជនកម្ពុជានេះ ធ្វើឡើងភ្លាមៗ នៅក្រោយប្រព័ន្ធផ្សព្វផ្សាយក្នុងស្រុកមួយចំនួនចុះផ្សាយ ដោយស្រង់សំដីមន្ត្រីជាន់ខ្ពស់គណបក្សប្រជាជនកម្ពុជា លោក ជាម យៀម ថា សមាសភាពគ.ជ.ប មកពីគណបក្សប្រឆាំងនឹងត្រូវរលាយជាស្វ័យប្រវត្តិ នៅពេលគណបក្សសង្គ្រោះជាតិត្រូវរំលាយ។ ប៉ុន្តែលោកថា ប្រសិនបើពួកគេចុះចូលជាមួយគណបក្សកាន់អំណាចនោះ ថ្នាក់ដឹកនាំគណបក្សប្រជាជន អាចនឹងពិចារណាទុកតំណែងឲ្យ។
ទោះបីជាបែបនេះក្ដីប្រធានគ.ជ.ប លោក ស៊ិក ប៊ុនហុក អះអាងដូចលោក សុខ ឥសាន ដែរថា សមាជិកគ.ជ.ប. ៤រូប ដែលជាកូតាមកពីគណបក្សសង្គ្រោះជាតិនោះ បានលាលែងចេញពីគណបក្សប្រឆាំងអស់ហើយ មុននឹងមកធ្វើការនៅស្ថាប័នគ.ជ.ប ដែលជាស្ថាប័នឯករាជ្យ មិនជាប់ពាក់ព័ន្ធនឹងគណបក្សនយោបាយ ដូចដែលមានចែងនៅក្នុងច្បាប់ ស្ដីពីការរៀបចំ និងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោត។
ចំណែកឯ អ្នកសម្របសម្រួលផ្នែកអង្កេតនៃអង្គការខុមហ្វ្រែល (COMFREL) លោក កន សាវាង្ស ចាត់ទុកការលើកឡើងរបស់លោក ជាម យៀប នេះថា ជាការគំរាមកំហែង ព្រោះច្បាប់បានចែងពីឯករាជ្យភាពរបស់សមាជិកគ.ជ.ប នៅក្រោយពេលពួកគេបានផ្ដាច់ខ្លួនពីគណបក្សនយោបាយហើយនោះ។
ទាក់ទងនិងបញ្ហានេះ អនុប្រធានគ.ជ.ប. លោក គួយ ប៊ុនរឿន និងមន្ត្រីជាន់ខ្ពស់គ.ជ.បមួយរួបទៀត គឺ លោក រ៉ុង ឈុន ដែលជាអតីតសមាជិកគណបក្សប្រឆាំង សុំមិនធ្វើអត្ថាធិប្បាយលើករណីនេះទេ។
សមាសភាពកំពូលគណៈកម្មាធិការជាតិរៀបចំការបោះឆ្នោត ទាំង៩រូប កើតចេញពីវប្បធម៌សន្ទនានៃគណបក្សជាប់ឆ្នោតទាំងពីរ នៅក្នុងអាណត្តិទី៥។ ដោយគណបក្សទាំងពីរបានព្រមព្រៀងគ្នារៀបចំសមាសភាព កំពូលគ.ជប.មានចំនួន៩រូប គឺសមាសភាពមកពីគណបក្សប្រជាជនកម្ពុជា ៤រូប មកពីគណបក្សសង្គ្រោះជាតិ ៤រូប និងជ្រើសចេញពីស្ថាប័នអង្គការមិនមែនរដ្ឋាភិបាល ១រូប។
រដ្ឋសភាបានបើកកិច្ចប្រជុំ និងប្រកាសសមាជិកទាំង៩រូបនេះ កាលពីថ្ងៃទី៩ ខែមេសាឆ្នាំ២០១៤ ក្រោយពីធ្វើវិសោធនកម្មច្បាប់ ស្ដីពីការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោតរួចរាល់។ ហើយច្បាប់នេះ បានតម្រូវឲ្យសមាជិកគ.ជ.បទាំងនេះ ត្រូវលាលែងពីបក្សនយោបាយជាមុនសិន ហើយពួកគាត់បានក្លាយជាបុគ្គលឯករាជ្យ ដែលប្រើនៅក្នុងស្ថាប័នរៀបចំការបោះឆ្នោតនេះ៕
No comments:
Post a Comment